ٍما يجب معرفته عن المستحضرات الواقية من الاشعة + ريفيو و مقارنة لصن بلوك نتروجينا و بايوديرما Sun Block Reviews-biderma & Neutrogena

 هلا هلا هلا 

منورين موضوع اليوم ، هيكون عن تكة بسيطة بس مهمة في روتين العناية بالبشرة و الجلد ، اللي هي الحماية و الوقاية من اشعة الشمس و الاشعة الضارة .

اساس

الحماية و الوقاية هو استعمال المستحضر المناسب على بشرة نظيفة .  بس في شوي نقاط كويس انه نعرفها و ننتبه عليها عشان نستفيد لاقصى درجة من مستحضرات الوقاية من الاشعة الضارة .

اول نقطة هالمستحضرات بتيجي على هيئية كريم او لوشن بس مش معناه دايما  انه كريم ترطيب فلازم تنتبهي عالمكتوب في العبوة : اذا مكتوب "moisturizer  " فالمستحضر بحتوي على مرطب و تقدري تستخدميه لحاله ، اما اذا  مكتوب sun block  او sun screen  فقط ، فلازم قبله تحطي المرطب المناسب لنوع بشرتك و تنتظري 10 دقايق و بعدين تحطي الواقي . عن نفسي و من تجاربي افضل الواقي اللي ماله علاقة بالمرطب احس مفعوله اقوى و نسبة الحماية فيه اكبر ، كمان مالقيت اي ميزة لكريم الترطيب اللي بنسبة حماية ، عامة هذا ما يمنع انك تجربي الاثنين و تشوفي اي نوع هيضبط معك .

النقطة الثانية : ننتبه  لمعنى SPF  ،           Sun Protection Factor       يعني معامل الحماية من الشمس                 ، هنشوف جنبه رقم يتراوح بين 30 الى 100 ، كثير ناس عندها لخبطة في مفهوم هالرقم ، المفهوم الشائع انه كل ما زاد الرقم كل ما زادت الحماية من الاشعة ،، الفكرة مش كذه بالضبط ، الصح انه الحماية هي ذاتها مهما كانت النسبة يعني الواقي ب spf 15  و الثاني ب spf 50  راح يعطوا نفس الوقاية و الحماية بس الفكرة انه كل ما زادت النسبة بيطول وقت الحماية ، يعني اذا هتتعرضي للحرارة مدة طويلة مثلا في مشوار طويل او على الشاطئ فبتحطي واقي ب spf  اكبر من 50  ، اذا الحرارة العادية ممكن تكتفي ب 30 ، عامة لازم الواقي يتجدد و يتحط كل ساعة او ساعتين .

النقطة الثالثة : و دي غالبا كلنا عارفينها و واعيين لها كويس انه هنختار المستحضر الملائم لنوع البشرة ، عامة يفضل ما يكون دهني و ثقيل عشان ما يثقل عالمسام خصوصا انه هنكون حاطين كريم مرطب قبليه . كمان بعض مستحضرات الوقاية هنلاقي مكتوب عليها tinted  يعني فيها لون خفيف – شخصيا ما افضل هالنوع ، و بصورة عامة ما افضل المستحضرات اللي فيها اكثر من خاصية و تقوم باكثر من وظيفة مثل ترطيب و لون و حماية و تصغير مسام الخ الخ الخ .

كمان في نقطة مهمة : كثير ناس بتتصور انه اذا الدنيا غيوم ما في داعي تحطي واقي من الاشعة !!! عشان نصحح هالفكرة لازم نعرف ان الاشعة نوعين      UVA و UVB   و الاشعة الضارة هي ال  UVA  و هذه بتكون موجودة حتى بوجود الغيوم و هي المسببة للتصبغ

مستحضرات الوقاية و الاسمرار و التان Tan

كمان في مفهوم شائع عن انه مستحضرات الوقاية من الاشعة يتحمي من تغير لون الجلد و الاسمرار ، مممممممممممم مش بالضبط . الاسمرار و تغير اللون بيحصل اذا ظليتي تحت الشمس وقت طويل . الواقي كل اللي بيعمله انه ياخر عملية التصبغ و يحمي من حروق الشمس و تلف الجلد ، يعني راح تسمري بس بدون ما يحرق جلدك من الشمس و يدون ما تشيخ و تتدمر الخلايا ، فاللي حابة تاخد لون تان من الشمس لازم تحط الواقي قبلها و تتشمس براحتها .

ريفيوز لافضل مستحضرين مجربتهم للان :

نتروجيناultra sheer sunscreen

من زمان و انا اقرا عليه ريفيوز و اكثرها ايجابية فلما لقيته ما ترددت اجربه ، و فعلا ما ندمت .

اولا شي هو مستحضر وقاية ، ما فيه ترطيب و لا شي و لا بيوعد باي معجزة ، مستحضر وقاية من الاشعة فقط لا غير .  قوامه في الاول كريمي ثقيل نوعا ما بس بيتوزع بسرعة عالجلد و بتمتصه البشرة بسرعة ، بيترك اثر دهني بسيط ، ما هتشوفيه الا اذا البشرة دهنية ، اذا عادية او جافة هيكون الامتصاص عادي جدا ،  بالرغم انه بشرتي من عادية الى دهنية ، بيعطي حماية معقولة جدا و ما بيسبب حبوب او لا بيسد المسام و ممكن اذا مرة حسيتيه كريمي تحطي بودرة عالخفيف عليه ، بس ما كنت اشوفه يحتاج ، خليت استخدامه خاص بالشتاء و الخريف لدهنيته . مثل ما ممكن نستنتج عيبه الصغير انه قد يكون دهني ، غير كذه هو يستاهل التجربة و الكمية في العبوة اقتصادية و كافية لثلاثة شهور و ممكن اكثر .

بايوديرما :

bioderma photoderm max 

ما يختلف كثير عن اللي قبله ، القوام متشابه بس اخف و اقرب الى اللوشن ، يتوزع اسرع البشرة ، بالاول بتشوفي لمعة و اثر دهني عالجلد بس سرعان ما بتمتصه البشرة ، مكتوب عليه انه fluid يعني المفروض قوامه خفيف و كمان تركيبته غير دهنية و هذا اللي خلاه يناسبني من حيث الاستخدام .

عيبه ان كميته صغيرة 40 ملل فقط و ده يخليه ما يضل اكثر من شهر و نص معي و انا من النوع اللي استخدم الصن بلوك يوميا فبالنسبة لي الكمية مش اقتصادية . 

بالرغم انه هالماركة عليها دعاية كبيرة و ريفيوهات جبارة لمنتجاتها بس مستحضراتها ما بها شي خاص و فائق للعادة ، ما اقول انها سيئة بالعكس جيدة بس مش لدرجة الضجة و الاسعار ، بس عامة تستحق انه تتجرب .

اتمنى افدتكم و لو بشي بسيط 

الى اللقاء في موضوع جديد 

instagram: @venuslifestyle_ara

snapchat